poovarasampoo: Mai 2020

Dienstag, 12. Mai 2020

தெய்வம்

1967 மார்கழி 15 இல் வெளியான மல்லிகை இதழில்
இடம்பெற்றிருந்த எனது கவிதை!

(அப்போது எனது புனைபெயர் - புங்கையூர் மகேசன்)

தெய்வம்
- புங்கையூர் மகேசன்

தெய்வமொன் றுண்டென்ற செய்தி கேட்டுத்
தெய்வமதைக் காணவெனத் திண்மை யுற்றேன்
பொய்யான வார்த்தையிது புரியா தேனோ
புகுகின்றாய் வீண்வேலை யென்றே சொன்ன
மெய்யன்பு கொண்டிட்ட நண்பர் வார்த்தை
விலக்கியபின் முனைந்திட்டேன் தெய்வம் காண
வெய்துறுதல் வேண்டுமெனும் உண்மை நெஞ்சில்
வேதனையை மூட்டியது விரைதலுற்றேன்

இப்புவியில் எங்கெங்கோ தேடி நின்றும்
இல்லையொரு தெய்வமென எண்ணி நெஞ்சில்
செப்புவழு வுற்றேனோ வென்றே தேரச்
சேயானேன் தாயவளைத் தேடிநின்று
இப்போது சொல்கின்றேன் அன்னா யிங்கு
இல்லையொரு தெய்வமெனச் செப்பும் வேளை
அப்போது அன்னையவள் புன்னகைத் தாள்
அன்ப தே தெய்வமென உற்றுணர்ந்தேன்

நினைத்துக்கொள்கிறேன்...

எழுத்துலகில் எத்தனை முகங்கள்...
அத்தனை பேரையும் ஒட்டுமொத்தமாக ஒரே தருணத்தில் நினைத்துக் கொள்ளாவிட்டாலும் அவ்வப்போது அவர்கள் என் நினைவில் வந்துபோகிறார்கள்.
எழுத்தை நேசிக்கும் இதயங்களுக்கெல்லாம் அடிக்கடி ஏற்படும் உணர்வுதான் இது.

முகம் தெரிந்த- முகம் தெரியாத,
நாம் அறிந்த - நாம் அறியாத,
நாம் பழகிய -நாம் பழகாத என்று எத்தனையோ விதமான படைப்பாளர்களை அவர்களது படைப்புக்கள் மூலம் நாம் சந்தித்திருக்கிறோம்.
சந்தித்து வருகிறோம்.

என்வரையில் என்னுள் வாழும் அவர்கள்பற்றிய
என் உணர்வுகளைப் பதிந்துவைக்கும் விருப்போடு
இதை எழுதுகிறேன்.
இவர்களில் ஒருவராக நீங்களும் இருக்கக்கூடும். அல்லது இவர்களில் பலரை நீங்களும் அறிந்திருக்கக்கூடும்.
வாசித்துவிட்டு நீங்கள் தரும் கருத்துக்களும்
அவர்கள் பற்றி நான் அறியாத பக்கங்களை அறிந்துகொள்ள உதவக்கூடும்.

எனவே நீங்களும் எழுதுங்கள்!
பின்னூட்டமாக அல்லது மின்னஞ்சலாக.
அவற்றையும் இங்கே இணைத்துக் கொள்கிறேன்.

அன்புடன்
சின்னாச்சியின்ரைமோன்